تدريب الأطفال على النوم أو الـ Sleep Training من أكتر الحاجات اللي تبان صعبة ونتايجها محبطة في أوقات كتير لما بنحاول ونلاقي مفيش فايدة! بس اللي كتير مننا مش بياخد باله منه هو إن لازم عشان نبدأ قصة التدريب على النوم ده تكوني انتي كأم مستعدة وظروفك تسمح بإنك تخصصي وقت طويل وتبقي هادية وبالك رايق لتدريب النوم. الدراسات بتقول إن أنسب وقت تبدأي فيه بعد ما طفلك يتم الاربع شهور بس ده ما يمنعش إن استعدادك انتي كمان شيء أساسي.
أفضل 5 طرق تدريب الأطفال على النوم
-
Check and console method
وده معناها بالعربي “التحقق والتهدئة” يعني هي إنك تحطي الطفل في سريره وتبوسيه وتحضنيه وتطلعي بره الأوضة لوقت معين، في الأول، بنبدأ بدقيقة أو اتنين بالكتير. وبعدها، تدخلي له الأوضة تطبطبي عليه تقولي له “ماما بتحبك”، تطمنيه وتخرجي تعيدي نفس الخطوة تاني. وكل ده بشرط إنك ما تشيليهوش ولا ترفعيه من سريره خالص، الباحثين بيقولوا إن الطريقة دي مناسبة من سن 7 شهور، وإنها بتاخد حوالي أسبوع عشان الطفل يتعود عليها.
-
Pick up – put down method
الطريقة دي مناسبة للأطفال اللي أقل من 7 شهور، لإنك فيها بتفضلي جنب الطفل من غير ما تسيبي الأوضة، بتهديه وتطبطبي عليه، ولما يعيط زيادة، تشيليه من السرير وتاخديه في حضنك لحد ما يهدي، ولازم ترجعيه سريره قبل ما يروح في النوم، المهم إنك بتهديه وهو دوره ينام لوحده.
-
The chair method
طريقة “الكرسي”: الطريقة دي أكتر طريقة تدريجية، وهي إنك بتحضّري الطفل للنوم، وتحطّيه في سريره، وتقعدي في كرسي جنبه في الأوضه لحد ما ينام. وكل يومين، تبعدي الكرسي شوية عن سريره، ومهم لما يصحي تطمّنيه بإنك ترجعي تقعدي جنبه تاني، المشكلة في الطريقة دي هي إنها ممكن تكون قاسية على الأم والطفل، فكرة إنها قاعدة جنبه وشايفين بعض ومش بتروح له وتحاول تهديه.
-
Fading method
الطريقة دي بتعتمد على مراقبة الوقت اللي الطفل بيكون تعب فيه وعايز ينام، والاعتماد على ده في تجهيزه وإدخاله السرير. وبعد كده، نبدأ نقدم معاد النوم 15 دقيقة، كل يوم لحد ما يتعود على المعاد الجديد، ويبدأ جسمه يهدا وينام فيه بسهولة.
-
Cry out method
وده بالنسبة لي (شخصيًا) أكتر طريقة مش بافضّلها بصراحة، وهي إننا بنتأكد إن الطفل واكل، ومغير، ومش محتاج حاجة، ونحطه في سريره، ومهما عيّط، مش بندخل له تاني أو نشيله من سريره لحد ما يتعود يهدا وينيّم نفسه لوحده.
مصادر:
Today”s parent
parents
التعليق باستخدام حساب فيس بوك